Os tractores comezan a moverse nestes momentos pola A-52 en Xinzo de Limia. Os gandeiros ourensáns comezaron con este bloqueo da autovía hai case un mes. Hoxe deciden desfacer a mobilización ante o compromiso do subdelegado do Goberno de reducir as multas ó mínimo posible e a colaborar na solución ás súas demandas.

É un dos asuntos dunha tarde na que o presidente da Xunta confirmou que non haberá compensacións para Altri despois do arquivo do proxecto. E na que soubemos tamén que o goberno galego vai acudir á vía xudicial para reclamarlle ó Ministerio de Transportes que informe das alegacións remitidas á comisión europea sobre a prórroga da AP-9.

Ademais, acabamos de saber que apareceu un cadáver aboiando no porto de Vigo. O corpo xa foi rescatado.

A Xunta acudirá á Audiencia Nacional para forzar ó goberno a desvela-los argumentos cos que defendeu as prórrogas da AP9 ante a Comisión Europea. O goberno galego non acepta a negativa do Ministerio a trasladarlle os informes enviados no marco do procedemento de infracción a España, e reclamará pola vía xudicial a súa entrega.

Tampouco os opositores ó proxecto de Altri en Palas dan por pechado ese capítulo. Ulloa Viva pide garantías de que non se reactivará o proxecto no futuro, e estudará as vías xurídicas para aseguralo.

Os abogados votan e rexeitan o novo baremo da Xunta para abona-las tarifas da quenda de oficio, que nin sequera abona parte dos novos servizos que deben ofrecer.

A obra de Rosalía recítase no aniversario do seu nacemento por todo o territorio, reivindicando unha muller feminista que defendía a súa lingua e a súa terra. Actos que desfrutamos nunha xornada de ceos abertos, con termómetros, a esta hora, xa primaverais.